Gedankenanstoss zum Thema Kastrationspflicht

A alli Politiker da usse...

Sie händ Hunger und Durscht, gspüred Angscht und Schmerz
Nei ihr Politiker, das isch kein Scherz
S’wird vemehrt wie blöd, doch gnueg Platz git’s kei
Drum werdeds oft abgschobe und landet elei
uf de Strass oder im Heim oder bi schlimme Lüt
Wo s’Läbe vom Büsi zählt grad emal nüt
Hunderttuusig Chätzli, tötet Jahr für Jahr
Will s’niemert wott, isch eu das klar?
 
S’chatzleid isch da und es isch gross!
Drum fröged mir eus, was isch bi eu los.
Isch das Bundesbern en ignorante Ort?
Und all das Blabla vo eu, sind leeri Wort?
Es zählt nur Prestige und Macht und Geld,
sicher keis Tierlebe, i euere Welt!
Mir badet us, was ihr verbocket,
wäred dem ihr in Bern bim Kafi hocked.
 
Bi Rege und Chälti si mir am löse,
und wänn mir usrüefed, si mir die Böse.
Ihr wäred am Hebel, Ihr chönted handle
Statt nur chli chillt i de Halle wandle.
Ignoranz macht nüt besser uf dere Wält
Und de Staat choscht d’Lösig ja nöd emal Geld!
E Kastrationspflicht wär simple und eifach izführe
und nur kei Angscht, ihr müessted kein Finger rüere.
will d’Halter müessted handle und Verantwortig zeige,
Ihri Chatze kastriere um neus Lide z’vermeide.
 
Sie händ Hunger und Durscht, gspüred Angscht und Schmerz
Nei ihr Politiker, das isch kein Scherz.
Kastrationspflicht muess ane, jetzt und sofort.
Das Leid muess stoppe, a jedem Ort!
Jetzt und sofort!
JETZT UND SOFORT!

Esther Geisser/NetAP 2023